AKTEUR ONDERHOUD: HÉLÈNE TRUTER deur Anna Grace

Hélène Truter is bekend vir haar rol in Klein Karoo, Wie laaste lag... en Orkney Snorknie! 2. Sy speel ook in die nuwe televisie-reeks, Pandjieswinkel wat later in 2014 op die televisie verskyn. Truter is bekend as aktrise en regisseur. Ek het vir haar ‘n paar vrae gevra oor haar rol as aktrise en regisseur in die toneelbedryf.

Beskryf jouself in 5 woorde?

Hélène Truter: Impulsief, kreatief, vreesloos, avontuurlustig en ongeduldig.

Wat is jou gunsteling fliek?

HT: Gewoonlik die een waaraan ek op daardie stadium werk. Ek kan die musical Burlesque ook oor en oor kyk.

Na watter musiek luister jy op die oomblik?

HT: Ek is 'n groot Adele aanhanger.

Wat is jou gunsteling tydverdryf?

HT: Ek hou van reis en nuwe plekkies ontdek.

Watter sport kyk/ speel jy graag?

HT: Ek's mal oor rugby, krieket en tennis, maar veral Rugby!

As jy enige ander talent kon hê, wat sou dit gewees het?

HT: Ek wens ek kon sing en dans soos 'n rock star!

Wat het jou laat besluit om toneel te speel?

HT: Dit was nie eintlik 'n besluit nie. Ek het Drama gaan swot maar nooit gedink ek is goed genoeg om 'n lewe daaruit te maak nie.

Wie het jou geinspireer om die bedryf te volg?

HT: Katinka Heyns het na ons skool gekom toe ek 'n kind was.

Vir watter optrede was jy al die meeste op jou senuwees?

HT: Toe ek na 17 jaar se afwesigheid weer op die verhoog geklim het. Die openingsaand van Sophia Mentz op Aardklop.

Met wie het jy al die lekkerste saamgewerk in die toneelbedryf?

HT: Ek het 'n lys so lank soos my arm: Sandra Prinsloo, Pierre Breytenback, Hannes van Wyk, Katinka Heyns en Koos Roets….

Teenoor watter akteur sal jy graag wil speel?

HT: Plaaslik: Dawid Butler, Willie Esterhuizen
Oorsee: George Clooney, Johnny Depp

Aan watter toneelstuk het jy die lekkerste gewerk?

HT: Sophia Mentz beredder haar boedel van PG du Plessis.

Wat was jou grootste uitdaging in die toneelbedryf?

HT: Om nee te sê vir werk.

Waarna sien jy uit in 2014?

HT: My reeks Swartwater (ek het dit geskryf) word hierdie jaar uitgesaai. Middel van die jaar word Pandjieswinkel uitgesaai waarin ek 'n heerlike rol gespeel het.

Wat is jou 5-jaar plan?

HT: Om my winkel Amulet nog verder uit te brei. Om 'n film te skryf. Ek wil finansieël onafhanklik wees en net werk doen wat vir my lekker is.

Wat is jou planne vir 2014?

HT: Ek werk op die oomblik aan 'n film draaiboek. Ek wil meer TV werk doen. Ek werk aan 'n eksklusiewe reeks produkte vir my winkel.

Wat was jou mees "embarrasing moment"  op die verhoog?

HT: My karakter moes by 'n deur inkom, toe sit die ding vas. Ek moes toe noodgedwonge by 'n venster inklim en val toe letterlik in, want my romp was te styf .Toe ek opstaan, was daar nie 'n akteur in sig nie want almal het agter meubels gelê en lag. Gelukkig was die gehoor in op die grap.

Watter raad kan jy vir jong mense gee wat die bedryf wil betree?

HT: Gaan swot eers en begin by verhoogwerk, dit leer jou dissipline.

Hélène Truter se televisie-reeks, Swartwater is tans op SABC 2 op Dinsdae aande om 19:30. Jy kan ook by haar winkel, Amulet, op Hermanus gaaan inloer.

AKTEUR ONDERHOUD: LOUW VENTER deur Anna Grace

Louw Venter is bekend as skrywer, komediant en akteur. Venter is bekend vir sy rol as Hertjie in Semi-Soet, Lukas in Konfetti, Hercules in Die Laaste Tango en Loki in Rugby Motors. Venter is ook bekend vir verskeie ander rolle in plaaslike films en televisie-reekse.  Venter het die kyknet televisie-reeks, Rugby Motors geskryf asook die film, Konfetti. Ek het vir hom ‘n paar vrae gevra oor sy rol in die toneelbedryf.

Wat is jou gunsteling fliek?

Louw Venter: Dit bestaan nie. Daar is 'n klomp reggiseurs, draaiboekskrywers, akteurs, komponiste en nog meer wat films maak, dat die vraag eintlik te groot is om te antwoord.

Na watter musiek luister jy op die oomblik?

LV: In my kar luister ek oor-en-oor Black Motion se Lazy song en ek het Andy Lund se nuutste album, Faster we Run op repeat in die huis.

Wat is jou gunsteling tydverdryf?

LV: Dit is maklik. Om saam met my kids en my vrou uit te hang. Daar is eintlik niks belangriker in die lewe nie.

Watter sport kyk/ speel jy graag?

LV: Ek was nooit 'n kranige atleet nie, maar ek is mal oor die krieket op die oomblik.

Wat het jou laat besluit om toneel te speel?

LV: Ek het geen idee nie. Ek het maar net begin en eers heelwat later eers gedink aan die feit dat ek dit iewers langs die pad moes besluit het. Ek voel mens word 'n kunstenaar omdat jy nie anders kan as om dit te wees nie.

Wie het jou geinspireer om die bedryf te volg?

LV: 'n Nederlandse teatergroep by name van Dogtroep wat  in 1995 in Johannesburg opgetree het, het my geïnspireer met hulle vermoë om die alledaagse in iets wonderbaarliks en anderwêrelds te verander. Ek kon nooit weer met dieselfde oë na die wêreld kyk nie. 

Vir watter optrede was jy al die meeste op jou senuwees?

LV: Ek het al 'n paar een-man teaterstukke geskryf en opgevoer. Wanneer die eerste nag se gehoor buite jou aantrekkamer gons terwyl jy jou stem warm maak, en jy besef dis net jy, op jou eensame eie, wat oor 'n paar minute op die planke gaan uitstap voor die ligte en daai mense, dan moet jy vasbyt, want dit is noggal scary.

Met wie het jy al die lekkerste saamgewerk in die toneelbedryf?

LV: Dis weer een van daai onmoontlike vrae, maar ek moet natuurlik sê, my tien plus jaar saam met die legendariese Rob Van Vuuren (Hy was Twakkie en ek was Corné ). Ons het baie sakke sout saam geëet deur die jare. Hy is nie sleg vir 'n kaboutertjie nie.

Teenoor watter akteur sal jy graag wil speel?

LV: Almal van hulle. Elke akteur bring iets na die partytjie toe.

Aan watter toneelstuk het jy die lekkerste gewerk?

LV: The Most Amazing Show met Corné en Twakkie was 'n eens op 'n leeftyd ding. Ons grootste live show ooit was vir agt duisend mense by Oppikoppi.  Agt duisend mense! Op die main stage vir 'n uur. Waar het jy al ooit van so iets gehoor in teater?

Wat was jou grootste uitdaging in die toneelbedryf?

LV: Om die konstante stres wat soveel rondreis op my lewe plaas te verwerk. Dit is nie net speletjies nie. Die film bedryf is eintlik baie veeleisend.

Waarna sien jy uit in 2014?

LV: Konfetti! Dis  'n fliek wat ek geskryf het en waarin ek die hoofrol speel so dis noggal 'n big deal vir my. Nico Panagio, Casey B Dolan, Kim Engelbrecht, Casper de Vries, Jana Strydom en nog 'n klomp ander amazing mense is in dit. Dit gaan oor Lukas Basson, 'n strooijonker wat sy beste vriend se troue organiseer maar ingewikkelde gevoelens vir die bruid koester, en 'n swakheid vir sjampanje het. Dit word uiteindelik 'n troue wat so mal is dis perfek. Ek werk al vir ses jaar om die fliek gemaak te kry, en ek dink dit gaan dood eenvoudig rock. Kom like ons op die Konfetti Facebook blad en kry al die skindernuus, kompetisies en ekstras voor die vrystelling. Dan is daar Kite waarin ek teenoor Samuel L Jackson verskyn saam met Deon Lotz onder andere en twee ander films later in die jaar. Dis ook heerlik vir my om te sien hoe Swartwater Dinsdae aande om 19:30 op SABC2 ontvou, en hoe mense reageer op die storie. Ek speel Francois Le Roux teenoor Jana Strydom wat my vrou, Karen Le Roux in die reeks vertolk. Dit is 'n baie swaar maar boeiende storie en ek was vir ses maanse weg van die huis om dit te skiet, so dit is baie opwindend om te sien hoe die storie gehore raak.

Wat is jou 5-jaar plan?

LV: Om aan te hou doen wat ek doen. Ek kan nie op die oomblik aan enigiets beter dink om te doen as wat ek reeds doen nie...

Watter raad kan jy vir jong mense gee wat die bedryf wil betree?

LV: Dit is eintlik baie hard hierbuite so jy kan net slaag as jy dit vir die regte redes doen. As jy voel jy wil toneelspeel omdat jy stories wil vertel wat mense gaan roer, is jy op die regte spoor. Dan is jy 'n kunstenaar en jy sal dinge doen wat selfs vir jou sal verras, maar as jy 'n akteur wil word en dit gaan vir jou oor op die voorblad van die Huisgenoot wees of die hoeveelheid followers wat jy het op Twitter het, dan lig jy dalk jou been teen die verkeerde boomstam. Daar gaan altyd stories wees om te vertel en karakters om te speel maar ongelukkig kan almal nie die gewildheidskompetisies wen nie, so jy moet seker wees van wat jou ware motiverings is.

Louw Venter kan in 2014 in die televisie-reeks, Swartwater gesien word. Sy nuwe film konfetti is ook op die silwerskerms in April.

AKTEUR ONDERHOUD: REYNARDT HUGO deur Anna Grace

Reynardt Hugo het by die Universiteit van Pretoria sy graad in Drama ontvang. Daarna het hy ‘n internasionale rol in die reeks, Life is Wild, ontvang. Hugo het onder andere in die teaterproduksies The F-Word, Anna Frank, Smokey Joe's Café en Boesman my seun verskyn. Huideglik is Hugo veral bekend vir sy rol as Tertius in Binnelanders asook sy rol as lid van die bekende Suid-Afrikaanse groep, Adam.

Beskryf jouself in 5 woorde?

Reynardt Hugo: Stil, gemaklik, vriendelik, perfeksionisties, snaaks

Wat is jou gunsteling fliek?

RH: Shawshank Redemption.

Na watter musiek luister jy op die oomblik?

RH: Armin van Buuren.

Wat is jou gunsteling tydverdryf?

RH: Klere koop.

Watter sport kyk/ speel jy graag?

RH: Krieket en krieket.

Wat het jou laat besluit om toneel te speel?

RH: Ek weet nie. My M-telling was goed genoeg om Universiteit toe te gaan, so toe gaan swot ek Drama.

Wie het jou geinspireer om die bedryf te volg?

RH: Niemand.

Vir watter optrede was jy al die meeste op jou senuwees?

RH: Skouspel 2013, want my ma het in die gehoor gesit.

Met wie het jy al die lekkerste saamgewerk in die toneelbedryf?

RH: Desiré Gardner, "Daleen" in Binnelanders.

Teenoor watter akteur sal jy graag wil speel?

RH: Robert Downey Jr.

Aan watter toneelstuk het jy die lekkerste gewerk?

RH: Boesman my seun.

Wat was jou grootste uitdaging in die toneelbedryf?

RH: Om na 7 jaar by Binnelanders, dit elke keer nuut en vars te hou. Dit is hoe ‘n mens groei.

Waarna sien jy uit in 2014?

RH: Ons nuwe CD wat uitkom, en om te reis.

Wat is jou 5-jaar plan?

RH: Om n suksesvolle Dramaskool te besit, ‘n suksesvolle agentskap te hê, nog toneel te kan speel, nog te kan sing en om ‘n huisie by die see te hê. :)

Wat is jou planne vir 2014?

RH: Om die land te toer met ons nuwe album.

Wat was jou mees "embarrasing moment"  op die verhoog?

RH: Toe ek by ‘n kerkfunksie waar ons moes sing, net in my onderklere en hemp gestaan het op die verhoog. Ek het my skoene en jean opgeveil vir die vrou wat die meeste geld ingesamel het..

Watter raad kan jy vir jong mense gee wat die bedryf wil betree?

RH: My raad is dat jy moet baie seker wees dat jy Drama wil doen. Dit is n baie moeilike industrie en jy moet dit aanpak soos n besigheid. Ons was 95 studente wat by Tukkies geswot het, omtrent 23 het graad gevang en 2 van daardie 23 mense, werk vandag in die industrie...so..be sure dit is wat jy wil doen. Dit gaan nie oor beroemd wees nie en jy moet seker maak dat jy by die regte plek gaan swot!

Reynardt Hugo kan in 2014 gesien word as hy die land deur reis met sy groep, Adam, en kan ook verder as Tertius in Binnelanders gesien word.

 

AKTEUR ONDERHOUD: ALBERT MARITZ deur Anna Grace

Albert Maritz is bekend op radio, die verhoog, televisie en ook  films, nasionaal en internasionaal. Hy is ook bekend as regisseur  en regisseer en vervaardig in 1996, sy eerste professionele produksie vir televisie: “Groot, groter as.... van N.P. Van Wyk Louw”. Maritz het al in verskeie films verskyn onder andere Invictus, Skoonheid, Verraaiers en The Color of Freedom. Hy het ook in televisie-reekse verskyn soos Donkerland, Vloeksteen, Arende en Vallei van die Sluiers. Ek het vir hom ‘n paar vrae gevra oor sy rol in die toneelbedryf.

Wat is jou gunsteling fliek?

Albert Maritz: Daar kom elke paar jaar 'n fliek oor mens se pad wat mooi verfilm is, 'n sterk storie het, sommer goeie akteursspel ook het en die magiese IETS wat mens se lewe aanraak. So 'n fliek is vir my Slum Dog Millionaire, The Life of PI, Philomena en Quartet en ook Pad na jou hart.

Na watter musiek luister jy op die oomblik?

AM: Ek speel deur al my ou kassette en daar is Art Garfunkel, Supertramp, Police en baie ander daarin.

Wat is jou gunsteling tydverdryf?

AM: Ek is mal oor lees en kry regtig min tyd daarvoor, fliek ook en oefen. Tans kry ek dit reg om heelwat fiets te ry en een keer per week skopboks ek in 'n groepklas.

Watter sport kyk/ speel jy graag?

AM: Ek kyk graag rugby, krieket, atletiek, swem en boks - veral as ek kan kant kies. As Suid-Afrikaners selfs gholf speel teen ander lande, kyk ek. Self hou ek van touch rugby, paddleski en sal ek enige iets probeer speel.

As jy enige ander talent kon hê, wat sou dit gewees het?

AM: Om instrumente te speel. Ek het 'n baie goeie oor vir musiek, maar kon nie musiek leer speel nie.

Wat het jou laat besluit om toneel te speel?

AM: Ek is aanvaar by die Universiteit van Kaapstad om 'n kombinasiegraad te volg met wetenskap en tale, maar toe kies ek om 'n drama onderwysgraad op Stellenbosch te doen. Dit was na die weermag en ek en my skoolpelle was verwyder van mekaar vir 2 jaar. Toe ek na universiteit 'n aanbod kry van Marius Weyers om by TRUK te werk, was die koeël deur die kerk. Ek het my HOD deur UNISA voltooi.

Wie het jou geïnspireer om die bedryf te volg?

AM: Ek het baie tyd saam met my pa en sy kollegas in die bedryf deurgebring as klein seuntjie. Ek dink dit het my erg geprikkel.

Vir watter optrede was jy al die meeste op jou senuwees?

AM: Dit gebeur soms. Kom ons kies die laaste een - die laaste opvoering van Land van Skedels op Oudtshoorn vanjaar.

Met wie het jy al die lekkerste saamgewerk in die toneelbedryf?

AM: Daar is baie mense wat dit 'n louter plesier maak. Ek wil amper sê elke toneelstuk wat ek doen, is pure pret.Die opnames van Vloeksteen was om baie redes baie bevredigend.

Teenoor watter akteur sal jy graag wil speel?

AM: Charlize Theron en talle Suid-Afrikaanse akteurs soos Andrew Buckland, Jamie Bartlett, Waldemar Schultz, Isadora Verwey en Petro van den Heever.

Aan watter toneelstuk het jy die lekkerste gewerk?

AM: Die waar ek regisseur was, nie akteur nie.

Wat was jou grootste uitdaging in die toneelbedryf?

AM: 'n Stuk waar dieselfde akteurs  terselfdertyd in twee stukke moes speel, met die stukke wat tegelykertyd speel. Die stukke speel rug aan rug met 'n gordyn tussenin, vir twee gehore wat voor hulle sit. Na pouse ruil die gehore om, en beide stukke speel weer, sodat die gehore sien wat agter aangegaan het.

Waarna sien jy uit in 2014?

AM: Ons verfilm hopelik 'n reeks, en 'n stuk van my besoek Innibos, die lekkerste fees.

Wat is jou 5-jaar plan?

AM: Ek gee dalk volgende jaar weer klas in opvoedkunde, en oorweeg om 'n honneurs daarin te doen. Ek het tot dusver net 'n HOD.

Wat is jou planne vir 2014?

AM: Behalwe vir die reeks en my besoek aan Innibos, is daar hope admin en beplanning vir die toekoms.

Wat was jou mees "embarrasing moment"  op die verhoog?

AM: Dit sou maar in die storielyn wees. Ek is gereeld embarrassed op ander plekke.

Watter raad kan jy vir jong mense gee wat die bedryf wil betree?

AM: Erf eers goed of kyk of jy nie familie in hoë plekke het nie.

Albert Maritz kan in 2014 gesien word waar hy die rol van Berto in Vallei van die Sluiers verder sal vertolk. Maritz kan ook gesien word by die Innibos fees.

KUNSTENAAR ONDERHOUD: JOSHUA NA DIE REËN deur Anna Grace

Joshua na die Reën is ‘n nuwe stem op die suid-afrikaanse musiek  mark wat ons land betower met sy unieke musiek. Die persoon agter Joshua na die Reën is Jacques de Villiers wat self die liriese musiek skryf en sing. Sy musiek is uiters uiteenlopend en van sy bekende liedjies is onder andere Lig op die Horison, Dra die liggies en Hardloop in die veld in. Joshua na die Reën verbaas jou met die uniekheid van sy musiek en met sy musiek wat glad nie tegnies aangepas is nie, kan jy nie help om nog te wil luister nie. Joshua na die Reën se musiek is gebaseer op persoonlik ervarings en is in ‘n klas van sy eie.  Ek het vir Jacques de Villiers ‘n paar vrae gevra oor sy rol in die musiekbedryf.

Wat is jou gunsteling fliek?

Jacques de Villiers: Lord of the rings, The Hobbit, Into the Wild en Nicholas Nicklebe.

Na watter musiek luister jy op die oomblik?

JdV: Coldplay, One Republic, Avicii en Brandi Carlisle.

Wat is jou gunsteling tydverdryf?

JdV: Ek geniet die buite lewe en die natuur. As ek kon, sou ek elke dag net tyd spandeer het om mooi plekke te ontdek.

Watter sport kyk/ speel jy graag?

JdV: Ek hou baie van draf en ek Scuba duik ook so nou en dan. Ek het nie ‘n TV nie, so ek kyk nie regtig sport nie, maar ek het baie respek vir mense wat goed is in sport!

As jy enige ander talent kon hê, wat sou dit gewees het?

JdV: uhm....haha, miskien sou ek mooi wou teken...en miskien break dancing.

Wat het jou laat besluit om te begin sing?

JdV: Ek glo 'n mens het 'n sekere roeping hier op aarde, elkeen sy eie unieke pad. Ek het van kleins af musiek baie geniet en ek was een die gelukkige kinders in die wêreld wie se ouers my drome raakgesien het en my daarin ondersteun het. Ek dink die wêreld stereotipeer baie as dit kom by wat die beste pad is om te volg in die lewe....skool...universiteit....'n goeie graad....werk...kinders..., en dit is asof ons almal begin glo het dit is die enigste pad. Ek is 'n groot voorstaander vir swot en trou, en kinders, maar ek dink as dit kom by wat jou drome is, dan is daar vir elkeen 'n unieke pad wat op die ou einde ook sal voorsien, indien mens hard werk daaraan!

Wie het jou geïnspireer om die sangbedryf te volg?

JdV: Daar is te veel mense wat my geïnspireer het, van kleintyd af, om hulle almal te noem, maar Arnold De Wet, Eugene Jensen, Micheal w. Smith, Hillsong, Jason Upton, my vriende op skool, eintlik amper almal. Ek het altyd probeer om my gevoelens om te sit in musiek, en daarom het almal in my lewe deel daaraan!

Vir watter optrede was jy al die meeste op jou senuwees?

JdV: My laaste klavier eksamen in my 4de jaar. Dit is erg as daar 4 van die beste pianiste in ons land sit en luister vir jou!

Wat was jou mees "embarassingste" oomblik op die verhoog?

JdV: Hahahaha...gelukkig was daar nog nie een nie, maar ek hoop daar kom een!

Saam met watter sanger sal jy graag wil sing?

JdV: Chris Martin van Coldplay.

Watter een van jou optredes was jou gunsteling?

JdV: Definitief op die strand by Gordons baai! Die son het gesak terwyl ons gesing het en dit was asemrowend!

Wat is jou grootste uitdaging in die sangbedryf?

JdV: Om aan te hou hard werk en om altyd te verbeter. Ek wil ook nooit my hart verloor en ophou skryf oor dinge wat my diep raak nie! 'n Mens kan ook vinnig moedeloos raak as jy vergeet wat jou pad is wat jy geroep is om te stap...

Wat was die grootste oomblik in jou beroep sover?

JdV: Toe ek uitvind ek is genommineer vir drie Ghoema toekennings. Dit was so onverwags, ek het nooit gedink dat dit sal gebeur nie. Ek het nie musiek begin maak omdat ek gedink het almal gaan daarvan hou nie, en ek voel baie bevoorreg as ek sien dat my musiek vir iemand iets kan beteken. Dit is seker die hoof rede hoekom ek musiek wil maak. As ek iets kan deel wat vir iemand iets kan beteken, dan voel alles die moeite werd.

Waarna sien jy uit in 2014?

JdV: Ons toer nou binnekort, ek en my band wat ook baie na vriende van my is. Ons toer van Margate af al teen die kus tot in Kaapstad. Ons begin 22 Maart en eindig 7 April. Ek sien regtig uit na elke optrede. Elke gehoor is anders en dit maak elke optrede vir my opwindend! Ek sien ook uit om te sien wat voorlê. Ek het al geleer...afwagting is baie beter as verwagting!

Wat is jou 5-jaar plan?

JdV: Ek besit nie so iets nie...die mens kan planne maak, maar ek het al gesien, vir my werk dit nie. (haha) Ek wag eerder en kyk!

Watter raad kan jy vir jong mense gee wat die sangbedryf wil betree?

JdV: Moet nie iemand anders probeer wees nie, jy moet jou storie aan die wêreld gee. Dit is al wat 'n tydlose impak sal hê, as jy doen wat in jou hart is sal die res verseker volg!

Joshua na die Reën kan in 2014 by verskeie plekke sien waar hy sal optreë saam met sy band. ‘n Mens kan hom ook bespreek vir enige funksie. Volg die volgende link vir meer inligting: http://www.joshuanadiereen.com/kalender/JNDR2014  

AKTEUR ONDERHOUD: DESIRE GARDNER deur Anna Grace

Desiré Gardner is bekend vir haar rol as verpleegster, Daleen Oosthuizen, in die televisie program, Binnelanders. Gardner het ook in die films Wolwedans in die skemer en Roepman verskyn asook die televisie reeks, 7de Laan. Gardner se van was eers Manthey, maar na haar troue het sy besluit om dit na Gardner te verander. Ek het vir Gardner ‘n paar vrae gevra oor haar rol as aktrise in die toneelbedryf.

Beskryf jouself in 5 woorde?

Desiré Gardner: Skaam, ekstrovert (is ek ja)

Wat is jou gunsteling fliek?

DG: Bridges of Madison County

Na watter musiek luister jy op die oomblik?

DG: Bon Ivor

Wat is jou gunsteling tydverdryf?

DG: Tyd saam met my seuna.

Watter sport kyk/ speel jy graag?

DG: Ek het geen ‘ball sense’ nie, maar ek hou van basketball.

As jy enige ander talent kon hê, wat sou dit gewees het? 

DG: ‘Ball sense’

Wat het jou laat besluit om toneel te speel?

DG: Hoe Lief ek dit het!

Wie het jou geinspireer om die bedryf te volg?

DG: Tobie Cronje.

Vir watter optrede was jy al die meeste op jou senuwees? 

DG: My one-woman-show, Beld, op Universiteit .

Met wie het jy al die lekkerste saamgewerk in die toneelbedryf?

DG: Quanita Adams, Reynardt Hugo, Jacques Bessenger, Lelia Estebeth, Nadia Valvekens, Rolanda Marais, Je-ani Swiegelaar, Dawid Minnaar en ‘n hele paar ander by Binneland. Eintlik is ons hele bedryf vol awesome mense!

Teenoor watter akteur sal jy graag wil speel? 

DG: Daar is te veel om te noem.  ;)

Aan watter toneelstuk het jy die lekkerste gewerk?

DG: ‘Noises Off!’

Wat was jou grootste uitdaging in die toneelbedryf?

DG: Om swanger te speel, alhoewel ek nog nooit n baba gehad het nie in Binneland, 2010.

Waarna sien jy uit in 2014?

DG: Al die onsekerheid en opwinding wat wag.

Wat is jou 5-jaar plan?

DG: Née wat, ek loop maar net waar die pad my vat.

Wat is jou planne vir 2014?

DG: Om soveel tyd saam met my James te spandeer en net ‘happy’  te wees.

Wat was jou mees "embarrasing moment"  op die verhoog?

DG: Ek het die hond, Fly, in Babe vertolk, en in die middel van die toneel het my stert in die deur vasgehaak en afgetrek. Ek moes sonder n stert en ‘n gat in my ‘suit’ verder perform.

Watter raad kan jy vir jong mense gee wat die bedryf wil betree?

DG: Moet nooit ophou leer nie, en join my en Reynardt Hugo se dramaskool, HUGO AND GARDNER, HEHE.

Desiré Gardner kan in 2014 verder as Daleen Oosthuizen in Binnelanders gesien word.

 

 

AKTEUR ONDERHOUD: LEANDIE DU RANDT deur Anna Grace

Leandie du Randt is bekend vir haar rol as Mieke in die kyknet tv-reeks, Getroud Met Rugby. Du Randt is bekend as aktrise, aanbieder en model en het ook in die films Egoli-The Movie, Susanna van Biljon, Semi-Soet en Klein Karoo verskyn asook die kort-film Drukkersbloed. Du Randt streef daarna om haar talente na die internasionale toneelbedryf te neem.

Beskryf jouself in 5 woorde?

Leandie du Randt: Emosioneel, passievol en sprankelend.

Wat is jou gunsteling fliek?

LdR: Ek het so baie. My all-time-favourite is Meet Joe Black.

Na watter musiek luister jy op die oomblik?

LdR: Kodaline en One Republic.

Wat is jou gunsteling tydverdryf?

LdR: Lees, series kyk en foto's edit.

Watter sport kyk/ speel jy graag?

LdR: Ek hou nie rerig van sport nie.

As jy enige ander talent kon hê, wat sou dit gewees het?

LdR: Sing.

Wat het jou laat besluit om toneel te speel?

LdR: Ek het dit nie besluit nie, dit is vir my besluit toe die Here my gemaak het. Dit is wie ek is. Dit het my al toe ek 2 jaar oud was gekies.

Wie het jou geinspireer om die bedryf te volg?

LdR: My vriendin, Heloise Janse van Rensburg.

Vir watter optrede was jy al die meeste op jou senuwees?

LdR: Elkeen het 'n andere tipe nervousness agter dit, maar sover was dit Jackie in Klein Karoo. Die kleiner, stiller karakters is baie uitdagend ,en ek het toe nog nooit so ‘n tipe komedie rol gespeel nie.

Met wie het jy al die lekkerste saamgewerk in die toneelbedryf?

LdR: Bouwer Bosch, Hanna Grobler en Hanli Rolfes.

Teenoor watter akteur sal jy graag wil speel?

LdR: Anna Mart van der Merwe en Sandra Prinsloo. Oorsee: Ryan Gosling, Anthony Hopkins, Johnny Depp, Julia Roberts, Kate Hudson en Sandra Bullock.

Aan watter toneelstuk het jy die lekkerste gewerk?

LdR: Ek geniet elkeen uit my hart uit!

Wat was jou grootste uitdaging in die toneelbedryf?

LdR: Om myself as 'n aktrise te vestig en my eerste hoofrol in 'n feature film wat Die Windpomp is. Dit begin 25 April draai in teaters landswyd draai.

Waarna sien jy uit in 2014?

LdR: Die Windpomp wat uitkom en my boek vir tienermeisies wat in Mei uitkom. Sy naam is Gemaklik in jou eie Lyf. Ek sien ook uit na al die films en reekse wat ek die jaar by betrokke is.

Wat is jou 5-jaar plan?

LdR: Ek wil groei as aktrise en my kuns net nog meer en meer uitbrei dat ek op internasionale vlak toneel kan speel. Ek sal ook graag my boek internasionaal wil neem.

Wat is jou planne vir 2014?

LdR: Ek wil planne maak vir my internasionale beroep en om ek wil groei as aktrise in die verskillende rolle wat ek gaan vertolk. Ek wil ook die lewe voluit geniet en compassion vir ander hê, en hulle aan te raak op enige goeie manier.

Wat was jou mees "embarrasing moment"  op die verhoog?

LdR: Ek het op my heel eerste dag van filming op Getroud Met Rugby se stel Kaka en Fifi gesê in plaas van Fafa en Kiki. Dit was nogal embarrassing!

Watter raad kan jy vir jong mense gee wat die bedryf wil betree?

LdR: Doen dit vir die regte redes... Oor jou hart en wese nie sonder dit kan gaan nie. Moet dit nie vir faam of geld doen nie, daardie dinge is skaars en tydelik, maar jou hart  hou vir ewig. Sorg dat jy iets anders ook het waarin jy belangstel of geld mee kan maak.

Du Randt kan in 2014 in die film, Die Windpomp, gesien word. Haar boek vir tienermeisies, Gemaklik in jou eie Lyf, verskyn ook in Mei op die rakke.